150 Қазақстан азаматына «Болашақ» халықаралық стипендиясын беру туралы шешім қабылданды. Бұл туралы мемлекеттік кеңесші Ерлан Қариннің төрағалығымен өткен шетелде кадрлар даярлау жөніндегі республикалық комиссияның отырысында айтылды.
Мемлекеттік кеңесші Ерлан Қариннің төрағалығымен Шетелде кадрлар даярлау жөніндегі республикалық комиссияның кезекті отырысы өтті. Онда 150 азаматқа «Болашақ» халықаралық стипендиясын беру туралы шешім қабылданды. Осыған сәйкес 120 стипендиант магистратурада, алты азамат докторантурада оқиды. Ал 24-і әлемнің озық университеттері мен өндіріс орталықтарында тағылымдамадан өтеді. Комиссия мүшелері қазір басымдық беріліп отырған мамандықтарға ерекше назар аударды. Тиісінше стипендиаттардың үштен екісінен астамы жаратылыстану және техникалық бағыттар бойынша білім алады. Сонымен қатар 33 азамат әлемдегі озық ғылыми-зерттеу орталықтарында ғылыми тағылымдамадан өтуге грант алды. Жиын барысында Ерлан Қарин үміткерлерді Мемлекет басшысының жолдауында жариялаған ұстанымдарға сәйкес мұқият іріктеу қажеттігіне тоқталды. Сондықтан ғылыми тағылымдамаға мемлекет үшін аса маңызды әрі экономикада жоғары сұранысқа ие мамандар ғана жіберіледі.