Достыққа газ берілді. 320 үй 2016 жылдан бері көгілдір отынсыз отырған еді. Енді олар от жағып, күл шығармайды. Тұрғындардың қуынышына ортақтасқан қала әкімі Ғабит Сыздықбеков Айлы кеш көшесіндегі үйлерге арнайы кіріп шықты.
Бұл үйлер Достық шағын ауданында орналасқан. Осындағы 320 абонент 10 жылға жуық газсыз отырған. Олар шағымын жауапты орындарға жеткізгенімен нәтиже шықпаған еді. Қала әкімі Ғабит Сыздықбековтің есептік кездесуінде мәселені алға тартып, шешілуіне уәде еткен. Енді міне көгілдір отынмен қамтылып отыр. Бұған тұрғындар да разы.
НҰРСҰЛТАН ҚОЖАМҚҰЛОВ, ҚАЛА ТҰРҒЫНЫ
Осы үйде 4 баламызды өсіріп отырмыз. Рахмет. Халықтың өтінішін қабылдап, осы газды кіргізіп берді. Біздің осы үйде тұрып жатқанымызға 6 ай болды. Пеш жақтық. Бірақ көршілеріміз сол бұрыннан газсыз отырған.
Шағынауданында газбен қамтамасыз етудің 3-кезеңі бойынша құрылыс жұмыстары былтыр басталған. Мердігер мекеме мерзімінен кешіктірмей, нысанды тапсырып отыр.
РЗАБЕК МЕҢДІҚҰЛОВ, ЭНЕРГЕТИКА ЖӘНЕ ИНФРАҚҰРЫЛЫМДЫ ДАМЫТУ БАСҚАРМАСЫНЫҢ БАСШЫСЫ
Осы арқылы осы ауданда газбен қамту жұмысы 99 пайызға дейін жетеді деп отырмыз. Сондай-ақ, сәуір-мамар айларында тағы кезегін күткен екі ауданға газ береміз деген жоспар бар.
Шаһар басшысы қазіргі уақытта газға қосылуға өтінімдер қабылдау басталғанын айтты. Үйді-үйлерге көгілдір отынды қосу үшін тұрғындар құжаттарын жинауы қажет. Алдымен QazaqGaz Aimaq-тан берілетін техникалық шарттардан бастау керек. Оларды eGov mobile мобильді қосымшасы арқылы өтініш беріп алуға болады.
ЕРМЕК ҚАЛДЫҒҰЛОВ, QAZAQGAZ AIMAQ ШЫМКЕНТ ӨНДІРІСТІК ФИЛИАЛЫНЫҢ ДИРЕКТОРЫ
Біріншіден ешқандай қиындық жоқ. Мемлекеттің тұтынушыға жасаған мүмкіндігі. Сондықтан азаматтар бізге келіп өтініш тасауы керек. Құжаттандыру мәселесін онлайн да жасауға болады.
Бір ғана Достық шағынауданының газбен қамтылу көрсеткіші 97 пайызға жетіп отыр. Мамандар осы жылы Жұлдыз, Жалын мөлтекаудандарына газ жеткізу жұмыстарын жандандырамыз дейді.