Түркістан облысы әкімінің орынбасары тағайындалды. ҚР Президенті Әкімшілігінің келісімімен өңір басшысының орынбасары лауазымына Талғат Жапарханұлы Қозбеков бекітілді. Түркістан облысының әкімі Нұралхан Көшеров облыс активіне жаңа орынбасарын таныстырды. Өңірді дамыту бағытында маңызды міндеттер жүктеліп отырғанын айтып, алдағы жұмысына сәттілік тіледі.
Талғат Қозбеков 1976 жылы Жетісу облысы Панфилов ауданы Көктал ауылында дүниеге келген. Абай атындағы Алматы мемлекеттік университетін «Экономист- маркетолог» және Аль-Фараби атындағы Қазақ Ұлттық Университетін «Заңгер» мамандықтары бойынша бітірген. Еңбек жолын 1999 жылы Панфилов ауданы бойынша салық комитетінің Салық аудиті бөлімінде салық инспекторы лауазымынан бастаған.
Әр жылдары бөлім басшысы, басқарма басшысының орынбасары, Панфилов ауданы бойынша мемлекеттік кірістер басқармасының басшысы лауазымдарын атқарды. 2020 жылдан бастап Атырау облысы бойынша Мемлекеттік кірістер департаменті басшысының орынбасары және Алматы облысы бойынша Мемлекеттік кірістер департаментінің басшысы лауазымдарында қызмет еткен. 2022 жылдың қыркүйек айынан бері Жетісу облысы бойынша Мемлекеттік кірістер департаментінің басшысы қызметін атқаған.
Талғат Қозбеков облыс әкімінің орынбасары ретінде Кәсіпкерлік және сауда, Құрылыс, Мемлекеттік сатып алу, Қаржы және мемлекеттік активтер, Экономика және бюджеттік жоспарлау басқармаларының жұмыстарына жетекшілік етеді.