Түркістанда украиналық «UBC» компаниясының серіктестері мен инвесторлардың қатысуымен бизнес-форум өтті. Халықаралық форумға Украина, Түркия, Грузия, Қытай, Әзербайжан, Өзбекстан және еліміздің ірі компаниялары қатысты. Жиында Түркістан облысының инвестициялық-экономикалық әлеуеті, мүмкіндіктері мен әл-ауқаты жайында жан-жақты таныстырылым жасалды.
Өңір басшысы аймақтың инвестициялық әлеуетіне тоқталып, жиынға қатысушыларды бірлесе жұмыс істеуге шақырды. Нұралхан Көшеровтің сөзінше, облыстың инвестициялық қоржынында 2025-2028 жылдарға жоспарланған 110 инвестициялық жоба бар. Бұлар 4,6 миллиард АҚШ долларына дейін инвестиция тартуға және 19 мыңнан астам жұмыс орнын құруға мүмкіндік береді. Осылай деген облыс басшысы, әкімдік инвесторлардың бастамаларын қолдауға дайын екенін атап өтті.
НҰРАЛХАН КӨШЕРОВ, ТҮРКІСТАН ОБЛЫСЫНЫҢ ӘКІМІ
– «Біз жаңа технологияларды қолдануға, қолдауға, дамуға, дамытуға дайынбыз. Бізде мұндай жобаларды жүзеге асыруға жеткілікті потенциял бар. сондықтан сіздерді біздің өңірге инвистиция жасауға шақырамыз»
Өңірде 210 мыңнан аса шағын және орта бизнес өкілдері жұмыс істейді. Оның ішінде, 160-тан астам жоба шетелдік инвесторлардың қатысуымен іске асырып жатыр. Өңір облыс атанған 2018 жылдан бері аймаққа шамамен 9 миллиард АҚШ доллары көлемінде инвестиция тартылған. Оның 63%-ы – жеке инвестициялар. Салымдар өнеркәсіп, жылжымайтын мүлік, ауыл шаруашылығы, туризм және жаңартылатын энергия көздері сынды салаларға бағытталған.
«UBC Group» компаниясының басшысы Игорь Гуменный облыс әкімдігі тарапынан көрсетілген қолдауға алғысын жеткізіп, Түркістан өңірінде тоңазытқыштар өндірісі жобасын жүзеге асыруға ниетті екенін жеткізді. Айта кетейік, «UBC Group» басшылығы 2023 жылы өндірістік алаңдарын Қазақстанға орналастыру туарлы шешім қабылдаған. Екі жақты келіссөздер негізінде компания өндіріс орны ретінде басқа емес Түркістанды таңдапты.
ИГОРЬ ГУМЕННЫЙ, «UBC GROUP» КОМПАНИЯСЫНЫҢ БАСШЫСЫ
Біз «UBC Group» компаниясы 1993 жылдан бері сусындар мен азық-түліктерге арналған тоңазытқыш жабдықтарын өндіру, жарнамалық материалдарды әзірлеу және өндіру, жабдықтар мен техникалық процестерді жобалау және монтаждау бағытында қызмет атқарамыз. Екі жақты ымырыластық пен ынтымақ, келісім екі тарапқа да тиімді деген пікірдеміз.»
Форум соңында қатысушылар баяндамашыларға көкейтесті сұрақтарын жолдап, өзара пікір алмасты. Шетелден келген инвесторлар Түркістан облысының инвестициялық әлеуетін оң бағалап, бірлесе жұмыс істеуге ниет білдірді.