Қала әкімі Ғабит Сыздықбеков қаладағы бірқатар құрылыс нысандарын аралады. Ең алдымен, реновация бағдарламасы аясында салынатын көпқабатты тұрғын үйлермен танысты. Жауапты тұлғаларға жаңа тұрғын үйді жобалау және салу кезінде халықтың қажеттіліктерін ескеру керек екенін жеткізді.
«Мүгедектігі бар азаматтар үшін қолжетімділікті қамтамасыз ету маңызды. Тұрғын үй барлық техникалық талаптарға сай болып, қала ортасының жайлы әрі қауіпсіз болуына ықпал етуі қажет» - деді Ғабит Сыздықбеков. Бұдан кейін әкім “Ордабасы” футбол клубының балалар академиясының оқу-жаттығу кешенін аралады. Материалдық-техникалық базасымен танысып, жас ойыншыларды дайындау үшін жасалған жағдайды бағалады. Бұдан бөлек, Қаратау ауданы, Ю. Сареми көшесінде жүргізіліп жатқан жол жөндеу жұмысын тексерді. Қала әкімі мердігер ұйым өкілдеріне құрылысты белгіленген мерзімде аяқтауды, сондай-ақ аумақты абаттандыруға ерекше көңіл бөлуді тапсырды. Одан соң “Тұлпар” көлінде орнатылып жатқан субұрқақ пен “Қызғалдақ” субұрқағына жарықдиодты элементтер орналастыру жұмыстарын көрді. Мердігерлерге барлық компоненттерді мұқият қарап, іске қосу жұмысын жақын арада аяқтау қажет деп ескертті.