Түркістанда «Жарқ етіп сөнген 20 жас» кітабының тұсаукесері өтті. Туынды қазақ спорт тарихында есімі алтын әріппен жазылған Бекзат Саттархановтың қысқа, бірақ жарқын ғұмырына арналған. Жиынға Олимпиада чемпионының анасы Сырлыгүл Шойбекова, танымал спортшылар, зиялы қауым, БАҚ өкілдері мен мектеп оқушылары қатысты.
Ер Бекзаттың есімі ел жадында. Жасөспірім оның өмірін үлгі етіп, ерлігін жиі айтып жүреді. Десе де жаңа туынды осындай Бекзаттың болмысын толық ашуға, жас балалардың жігерін оятуға мол мүмкіндік берері сөссіз. Басқосуда Сырлыгүл Шойбекова баласының спортқа деген сүйіспеншілігі мен табандылығы туралы естеліктерімен бөлісті. «Ұлдың табысты болуы – ең алдымен, ананың тәлімінің нәтижесі» деген ұлағатты сөзді негізге ала отырып, қатысушылар Бекзаттай батырды тәрбиелеген анасына алғыс білдірді.
Кітаптың авторы Ержан Арғынбаев туындының жазылу тарихын таныстырып, Бекзаттың жеңісті жолы, рухани болмысы мен армандары туралы баяндады. Оның айтуынша, бұл кітап спортшының өмірбаяны ғана емес, жасампаздық пен қайсарлықтың символына айналған рухани еңбек.
Кездесу барысында қатысушылар Бекзаттың мұрасын сақтау мен дәріптеу жайлы ой-пікірлерін ортаға салып, көкейдегі сұрақтарын қойды. Бұл еңбектің жас буынға рух беріп, жаңа белестерді бағындыруға жігер сыйлайды деп, сенім білдірді.