Түркістанда байдарка мен каноэ есуден ересектер арасында ел чемпионаты басталды. Төрт күнге жоспарланған жарыс олимпиадалық стандартты ескек есу каналында өтеді.
Дүбірі додаға еліміздің 11 өңірінен сен тұр, мен атайындар келген. Жарыс жолында мүдірмей, жүзден жүйрік атанған спортшылар ұлттық құрамаға шақырту алып, мамыр айында Қытайдың Нанчанг қаласында өтетін Азия чемпионатында ел намысы қорғайды.
ДЕНИС ЖАРМЕНОВ, ОБЛЫСТЫҚ СУ СПОРТЫ ТҮРЛЕРІ МЕКТЕБІНІҢ ДИРЕКТОРЫ
---Мына сайысты өткізіп болғаннан кейін, 2026 жылы өтетін Азия чемпионатын тап осы Түркістанда өткізу жөнінде келіссөз жүргізудеміз. Спорттың бұл түрі елімізде, әсіресе Түркістан облысында қарыштап дамып келеді. Оны спортшылардың жоғары нәтижелері де айғақтайды.
Дилфуза Эргашканова – ескек есу спортына 12 жасында келген. Содан бері жаттығуларды үзбей, шеберлігін шыңдап келеді. Көрсеткен нәтижелері мен қол жеткізген марапаттары да көңіл қуантарлық. 10 жыл ішінде Азия чемпионатының жүлдегері атанып, халықаралық додаларда топ жарған.
ДИЛФУЗА ЭРГАШКАНОВА, СПОРТШЫ
--- Спорттың бұл түрі өте қызықты. Ой мен дене белсенділігін қатар дамытады. Бүгінгі сынға дайындық жоғары деңгейде. Жарыс алдында бар күш жігерді қосып, әбден дайындалдық. Бүгін жеңіске жету үшін барымызды саламақпыз.
Жарыс жолын аяқтап, мардымды нәтиже көрсеткен жүлдегерлер марапатталды. Олар енді алда өтетін әлемдік додаларға дайындық жасап, ел намысын қорғайды.