Азық-түлік бағасы үнемі бақылауда. Осылай деген қала әкімінің орынбасары, ресми өкіл Сәрсен Құранбек әлеуметтік маңызы бар тауар бағасын негізсіз көтергендер жауапкершілікке тартылғанын жеткізді. Кемшілікке 232 кәсіпкер жол берген. Бұл ретте арадағы делдалдардың да әрекеті ескерусіз қалмады.
Әлеуметтік маңызы бар тауарлардың бағасын негізсіз өсірмеу мақсатында қаладағы 90-ға жуық сауда орындарымен келісім жасалған. Оларда белгіленген 19 тауар түрі нарықтан 10-15 пайызға төмен сатылып жатыр. Соңғы кездері картоп пен сиыр етінің бағасына қымбаттады. Мұның себебін Сәрсен Құранбек былай деп түсіндіреді:
Күнделікті тұрмысқа қажетті азық-түлік бағасы үнемі бақылауда. Бұл реттегі тексеріс жұмыстары бір сәтке болсын тұралаған емес. Нәтижесінде, ойына келген бағаны қойған кәсіпкерлер анықталып, 177 кәсіпкерлік субъектісі әкімшілік жауапкершілікке тартылған. Сондай-ақ дүкендерге тауар жеткізетін 153 делдал нарықтан шеттетілген. Сөйтіп, сауда орындары дистрибьюторлар және өндірушілермен тікелей байланыстырылыпты.
Қала әкімінің тапсырмасына сәйкес, әлеуметтік сауда нүктелерін ұлғайту мақсатында 70-ке жуық жер белгіленіп, «Бақша» атты әлеуметтік павильонның 10 нүктесі іске қосылған. Жыл соңына дейін тағы 60-ын ашу көзделіп отыр екен. Сонымен қатар әлеуметтік тауар бағасының халыққа қолжетімді болуы үшін әр аптада жәрмеңкелер ұйымдастырылып келеді. Онда дихандар өз өнімдерін делдалсыз саудалауға мүмкіндік алған. Ол қаланың 7 жерінде өткізіледі.