Түркістанда «Қазақ тілі – ғылым тілі: жасанды интеллект және терминология» атты халықаралық симпозиум өтіп жатыр. 1 Сәуір күні басталған іс-шарада қазақ тілін ғылым тілі ретінде дамытудың өзекті мәселелері қозғалуда. Алқалы жиынға еліміздің өзге қалаларынан және шет мемлекеттен делегаттар қатысып жатыр.
Симпозиумның басты мақсаты – қазақ тілін ғылым тілі ретінде дамытудың өзекті мәселелерін анықтау, талқылау; жасанды интеллект жүйесін пайдалана отырып, қазақ тілінің терминологиясын дамыту жолындағы заманауи үдерістер мен қолданыстарын саралау. Жиында мамандар ғылым тілінің болашағына қатысты шешімдер мен тұжырымдамаларды ортаға салды.
Бас қосуда 16 томнан тұратын «Асыл ағаш, Асыл шөп: Қазақстан флорасының жетекші тұқымдастары» сериясының және «Ата жұрттан ана жұртқа – білім көпірі» жобасы аясында түрік тілінен қазақ тіліне аударылған 10 оқулықтың тұсауы кесіліп, оқырманға жол тартты. Ал Түркістан облысының әкімі Нұралхан Көшеров, тақырып төңірегінде ой қозғап ұсыныстар айтты.
Маңызды басқосуда танымал ғалымдар, филологтар, профессорлар, тіл жанашырлары тақырыптық баяндамалар жасап, қатысушылармен пікір алмасты.
Қазақ тілінің мерейін асқақтатып, ғылым мен жасанды интеллект, терминология салаларының өзекті мәселелерін жан-жақты қарастыратын симпозиум 4 сәуірге дейін жалғасады.