Қала әкімі Қаратау ауданында “KazBuilPartner” ЖШС-нің металл конструкция мен резервуар өндіретін зауытына барды. Компания жұмыс істеген жылдар ішінде әртүрлі нысандардың құрылысында тәжірибе жинақтап, 50-ге жуық адамды жұмыспен қамтыған. Алдағы уақытта кәсіпорын жоғары технологиялық жабдықтар орнатып, өндірістік қуатын арттыруды жоспарлап отыр.
Сонымен қатар Абай ауданында Байдібек би даңғылын күтіп-ұстау және А-2 айналма жолын қайта құру жұмысымен танысты. Жолаушылар көлігі және автомобиль жолдары басқармасының басшысы мен мердігер ұйым өкілдеріне жол төсемін ретке келтіріп қана қоймай, автотұрақтарды да абаттандыруды тапсырды. Одан соң Тұран ауданына барып, Қажымұқан Мұңайтпасов атындағы Орталық стадионға төселіп жатқан газонның сапасын көрді. Дене шынықтыру және спорт басқармасының басшысына барлық жұмысты, әсіресе жүгіру жолағындағы тартан жабынын жаңартуды уақытылы аяқтаудың маңыздылығын атап өтті. Сонымен қатар Әл-Фараби ауданында Қонаев даңғылын ұзарту жұмысының екінші және бесінші кезеңдерін, сондай-ақ Қалдаяқов көшесіндегі жаңа гүлзар құрылысын тексерді. Бұл қоғамдық кеңістік Арнайы әлеуметтік қызметтер көрсету орталығы ғимаратының жанында орналасқан. Жауапты тұлғаларға абаттандыру барысында барлық аспектілерді ескеріп, мүмкіндігі шектеулі азаматтардың кедергісіз қозғалысы үшін қажетті талаптарды сақтауды тапсырды.