Қазығұрт ауданында «Үлгілі ауыл» атанып кеткен Шарбұлақ жерінде Наурыз тойы тойланды. Жастар алаңына ақ шаңқан үйлер тігіліп, ұлттық ас мәзірі дайындалды. Арнайы спорттық сайыстар ұйымдастырылды.
Ораза айт мейрамымен тұспа-тұс келген Наурыз думанына жиылған жұрттың қарасы қалың. Ұлттық мерекенің ең басты ерекшелігін ұмытып бара жатқан сияқты көрінеміз. Наурыз – қамқорлықтың, мейірімнің айы. Бұл мейрамды ізгі тілек, ізетті қамқорлықпен қарсы алу парызымыз дейді ауыл ақсақалдары.
Наурыз мейрамы дегеніміз – ошақтың үш бұтындай болған ұлыстың кем-кетігін толтыру, аз қамтамасыз етілген отбасыларға қамқорлық таныту. Осы орайда ауылдың белсенді азаматтарының ауылдастарына көрсеткен көмегі де орасан.
Айтып өтейік, ынтымағы жарасқан Шарбұлақ ауылы 2024 жылы «үздік ауыл» номинациясын иемденген. Береке мен мызғымас бірліктің нышаны болған елді мекен осылайшы Әз-Наурыз мерекесін сән-салтанатымен тойлады.