ІV шақырылымдағы Шымкент қалалық Қоғамдық кеңесінің 1-ші отырысы өтті. Алғашқы жиында жаңа мүшелерге куәлік және төсбелгі табысталып, Кеңестің ережесі бекітілді. Сондай-ақ жаңа құрамның төрағасы сайланды.
Қалалық мәслихаттың төрағасы Бахадыр Нарымбетов жаңа құрамның жұмысына сәттілік тілеп, төсбелгі табыс етті. Мәслихат төрағасы азаматтардың 70 пайыздан астамы Кеңеске бірінші рет кіргенін атап өтті.
БАХАДЫР НАРЫМБЕТОВ, МӘСЛИХАТ ТӨРАҒАСЫ
---Бұл да бір өзгерістің белгісі деп білемін. Жаңадан құрылған Қоғамдық кеңес құрамында үшінші шақырылымнан қалған азаматтар да бар. Олар өз тәжірибелерімен бөлісіп, өздеріңізбен әрі қарай үйлесімді жұмыс істеуге септігін тигізеді деп білеміз. Қазір өте жауапты кезең. Қала қарқынды дамып келеді. Осындай кезеңде сіздерге халықтың үнін, пікірін, халыққа қолайлы шешімдерді жоғарыға жеткізе білуде зор жауапкершілік жүктеліп отыр. Жемісті жұмыс жасаңыздар. Жұмыстарыңызға сәттілік тілеймін.
Жаңа кеңестің құрамына 29 азамат кірді. Оның 12-і азаматтық қоғам өкілдері, мәдениет, білім, медицина саласынан – 6 адам, кәсіпкерлік саласынан – 7 адам, 2 заңгер, 2 журналист тізімге енген. Кеңестің мүшесі болуға өтінім тастағандардың бірі М.Әуезов атындағы Оңтүстік Қазақстан зерттеу университетінің 3 курс студенті Әсел Арманқызы. Сөзінше, жас буын үнін жеткізу үшін кеңес құрамында жастардың көп болғаны дұрыс дейді.
ӘСЕЛ АРМАНҚЫЗЫ, ҚОҒАМДЫҚ КЕҢЕС МҮШЕСІ, СТУДЕНТ
---Қоғамдық кеңесте жастардың саны көбеюі керек. Себебі жастардың үнін жастар түсінеді және естиді. Мен өзім студент болғандықтар студенттердің үнін осы қоғамдық кеңесте айтып соны жеткізетін елші боламын деп үміттенемін.
Жиында кеңес мүшелері жаңа төраға лауазымына жергілікті атқарушы органдарда басшылық қызмет атқарған Бұхарбай Пармановты ұсынды. Көпшіліктің дауысымен Бұхарбай Рысқұлұлы ІV шақырылымдағы Шымкент қалалық Қоғамдық кеңесінің төрағасы болып сайланды.
БҰХАРБАЙ ПАРМАНОВ, ҚОҒАМДЫҚ КЕҢЕСТІҢ ТӨРАҒАСЫ
--- Тұрғындармен қаладағы атқарушы билік арасындағы осы атқарылатын жұмыстар бар көптеген. Бюджетті талқылау, бюджетті талқылау кезінде көптеген қаланың ішінде біраз атқарылатын жұмыстарға тұрғындардан көптеген өтініштер түсіп жатыр. Біз осының барлығын билікпен бірге атқарып, жұмыстардың дұрыс жүруіне бюджеттің дұрыс қалыптастыруына сонымен қатар тұрғындардың өтініштерін, сұраныстарын тыңдап, билікке жеткізіп халықпен бірге жұмыс жасаймыз деген ойдамыз.
Жиын соңында Қоғамдық кеңестің ережесі бекітілді. Жаңа мүшелері жұмысты нәтижелі атқаруға уағдаласып тарқасты.