Шымкентте соңғы екі айда 268 адамды ит қапқан. Бұл статистиканы бүгін қала әкімінің ресми өкілі Сәрсен Құранбек айтты. Зардап шеккендер медициналық көмекке жүгініп, бақылауға алынған. Әбүйір болғанда араларында құтыру жұқтырғандары жоқ. Қалада қаңғыбас иттердің көбеюіне не себеп? Олармен күрес қалай жүріп жатыр? Толығырақ алдағы сюжетте.
Қаңғыған төрт аяқтыларға қатысты қала тұрғындарынан соңғы 3 айдың ішінде 2 мыңнан астам арыз түскен. Нәтижесінде 11 мыңға жуық ит-мысық ауланыпты. Оның жартысынан көбі агрессивті және емделмейтін аурулармен ауырады екен.
Итіңізге ие болмасаңыз, айыппұл арқалайсыз. Сондай-ақ төрт аяқтыңыздың төлқұжаты түгел болмаса да шара көріледі. Осылайша, қаладағы қаңғыбас ит, мысықтардың санын азайтуға сеп боламыз деген, Сәрсен Құранбек жыл басынан бері жануарларға жауапкершілікпен қарамаған 32 адамға 688 мың теңге айыппұл салынғанын айтты.
Қазір бұрынғыдай ит-мысықты аулап, өлтірмейді. Заң аясында оларды изгілікті тәсілмен қолға түсіріп, арнайы орында бағып-қағады. Төрт аяқтыларға питомникте барлық жағдай жасалған. Онда 1,5 мыңға жуық ит-мысық сияды. Қала аумағында жалпы 100 мыңға жуық иесі бар иттердің есебі алынған. Жыл сайын 40 мыңға жуығы ауланады екен.