Жұмысшы мамандығын таңдаған жандардың еңбегі елдің берекесі. Қарапайым еңбек адамын дәріптеу үшін биыл елімізде «Жұмысшы мамандықтар жылы» жарияланған. Осыған орай, әріптесім Айгерім Дәулетбекқызы өндіріс майталманының бір күндік жұмысының құпиясымен танысып қайтты.
Осындай жандардың бірі – Гүлайхан Шалқарова. Ол 1987 жылдан бері Шымкент май зауытында еңбек етіп келеді. Бригадирліктен бастап, цех бастығы, аға шебер, бүгінде бас технолог қызметіне дейін көтерілген.
ГҮЛАЙХАН ШАЛҚАРОВА, БАС ТЕХНОЛОГ
Біздің елде май өндірісінің мамандары болмаған кезде Ташкентке оқуға жіберді. Содан бері осы салада келемін.
Зауыт күнбағыс пен мақтадан май өңдеп, халыққа таныс «Доня», «Сафи», «Южанка» өнімдерін шығарады. Қалдықсыз өндіріс. Майдан қалғаны сабынға айналады, мал азығына беріледі. Бүгінде мұнда 700-ге жуық адам еңбек етеді. Кәсіпорын жылына 40 мың тонна өсімдік майын, 6,5 мың тонна кір сабын өндіреді. Гүлайхан апайдың міндеті тәулік бойы дайындалған өнімнің сапасын бақылау.
ГҮЛАЙХАН ШАЛҚАРОВА, БАС ТЕХНОЛОГ
Түнде шыққан өнімнің анализін таңертең қарап, проблемаларын анықтаймыз. Қай жерде мәселе болса, күндіз дұрыстаймыз. Сапаға жауапкершілік бізде.
Дегенмен өндірістің басты қиындығы, маман тапшылығы.
ГҮЛАЙХАН ШАЛҚАРОВА, БАС ТЕХНОЛОГ
Қазіргі жастарға айтарым: бір күндік табысқа алданып кетпей, өндіріске бет бұрса деймін. Өйткені біз білетінді үйретіп қалдырғымыз келеді, бірақ үйренемін деушілер аз.
Май зауытының қырық жылға жуық тарихына куә болып келе жатқан Гүлайхан Шалқарова еңбек адамының айқын бейнесі. Оның өмір жолы жастарға үлгі, елге өнеге.