Биыл Ата Заңға 30 жыл. Айтудлы датаға орай мегаполистің әр ауданында түрлі іс-шаралар ұйымдастырылып жатыр. Еңбекші ауданы да Қазақстан-Түркия достығы саябағында осы маңызды күнге арналған мерекелік концерт өткізді. Көпшіліктің көңілінен шыққан бұл кеш ел бірлігін бекемдеуге бағытталған жылы кездесу болды.
Күміс көмей әншілер мен мың бұралған бишілер, марапаттау сәттері саябаққа жиналған көпшіліктің көңілін көтеріп, ерекше әсер сыйлады. Шымкент қалалық филармониясының орындаушылары, «Шаттық» би ансамблі және «Самғау» ұлттық аспаптар ансамблі өз өнерлерін ұсынып, көрермендерге көтеріңкі көңіл-күй тарту етті.
Салтанатты кеш ауданның дамуына үлес қосқан азаматтарды марапаттаудан басталды. Еңбегімен дараланған тұрғындарға аудан әкімінің орынбасары Ерлан Миятбекұлы құттықтау сөз арнап, алғысын білдірді. Құрметке бөленген жандар ерекше қуанышқа кенелді.
РОЗА БАЯХАТОВА, «МҰРАТ-ДАНТИС» СТОМАТОЛОГИЯЛЫҚ КЛИНИКАНЫҢ ДИРЕКТОРЫ
Барлық халқымызды қала халқын барлығын осы 30 жылдық конституция мерекесімен құтықтаймыз. Конституция заңдарын сақтап орындайтын болып жүрейік. Бүгінгі іс-шараны өткізіп жатқан Еңбекші ауданы әкімшілігіне өте ризамыз.
Ашық аспан астында өткен концерт көрермендердің көңілінен шықты. Қала тұрғындары мен қонақтар өнер шеберлерінің қойылымдарын ыстық ықыласпен қарсы алып, зор қошемет көрсетті. Жиналған қауым Конституция күніне арналған іс-шараға риза болып, рухани ләззатпен тарқасты.