Түркістандықтар жыл сайын жылу жинап Рамазан айында 2 мұқтаж отбасыға баспана сыйлайды. Қалыптасқан дағды, игі дәстүр биыл да жалғасын тауып, 1994 жылы туған азаматтар көп балалы отбасыға су жаңа пәтер кілтін табыстады.
9 баланың анасы Мөлдір Сариева – жұбайымен бірге үй жалдап, пәтерден-пәтерге көшіп титықтаған. Бүгін қолына 4 бөлмелі өз баспанасының кілтін алып, қуаныштан құраш ұшып тұр. Көп балалы отбасы жаны жомарт, пейілі кең жерлестеріне алғыс айтады.
«Бекзат» мөлтек-ауданының тұрғындары баспана сыйлау үрдісін дәстүрге айналдырған. Әртүрлі жылдары туған азаматтар ұйымдасып, лек-легімен қайырымдылық жасайды. Мәселен, бұған дейін 1982, 87, 88-ші жылғы азаматтар бас біріктіріп, мұқтаж обасыға үй салып берген. Ал бүгін тап осы эстафеталық қайырымдылық жүйесін 1995 жылы туған азаматтар жалғастырды.
Құрылыс жұмыстарын белсенді топ өзі жүргізген. Бұл «Бекзаттықтар» сыйлаған 18-ші баспана. Игі іс осылай жалғаса бермек, - дейді ұйымдастырушылар.