Биыл Түркістан облысында 896 мың гектар жерге ауыл шаруашылығы дақылдары егіледі. Бұл өткен жылмен салыстырғанда 26 мың гектарға артық. Деседе ағын су мәселесі күн тәртібінен түскен емес. Түркістан облысының әкімі Нұралхан Көшеров жауапты басшыларға осы саладағы жұмысты жандандырып, диқандарға қолдау көрсету жөнінде тапсырма берді.
Қазіргі таңда облыс аумағында жаздық дақылдарды егу жұмыстары қарқынды жүріп жатыр. Суармалы егістік жерлерін ағын сумен қамтуға жыл сайын 4,9 млрд текше метр ағын су лимиті бекітіледі. Дегенмен соңғы жылдарда ірі инвестициялық жобалардың іске асырылуына байланысты облысқа нақты қажеттілік 5,8 млрд текше метрге жетті.
ФАЙЗУЛЛА БАЙДУЛЛАЕВ, АУЫЛ ШАРУАШЫЛЫҒЫ БАСҚАРМАСЫНЫҢ БАСШЫСЫ
Су қоймаларда жиналған су көлемі жақсы деңгейде, орташа есеппен 71 пайызды құрап отыр. Оның ішінде «Шардара» су қоймасы 87 пайызға толған. Қазіргі таңда «Қызылқұм» магистралды каналы арқылы Шардара ауданына сор шаю жұмыстарына 125 м3/сек ағын су босатылуда. Егістікке қажетті ағын су көлемі шаруалардың сұранысына сәйкес босатылып, вегетациялық маусым қалыпты деңгейде басталған. Облысқа қажетті ағын судың 63%-ы көрші мемлекеттердің аумағынан келеді. Үкіметаралық деңгейде бекітілген 1116 млн. м3 ағын су кестеге сәйкес босатылып жатыр.
Былтыр Түркістан өңірінде облыстық бюджет есебіне 43 шақырымды құрайтын 11 су нысанына күрделі жөндеу жұмыстары басталды. 1350 шақырым қашыртқыға механикалық тазалау жұмыстары жүргізілді. Нәтижесінде 2,9 мың гектар жер сумен қамтамасыз етіліп, 26,9 мың гектар аумақтың мелиоративтік жағдайы жақсарған.
Су нысандарын «Ислам даму банкі» қаржысын тарту есебінен қалпына келтіріліп жатыр. Алғашқы кезеңге «Тұран су» кәсіпорны арқылы 14 жоба қаржыландырылып, 166 шақырым канал бетонмен қапталып, 53,3 мың га суармалы жердің су жеткізу қабілеттілігі артады.