Қазығұрт ауданында осыдан екі жыл бұрын салынған көпқабатты екі үй жарамсыз күйге түсті. Мемлекеттік бағдарламамен салынған баспана қолданысқа берілгеннен кейін бір айда-ақ сыр беріп, қабырғалары қақ айырылған. Алайда, жергілікті билік пен мердігерлер сапасыз тұрғызылған қос ғимаратты жамап-жасқаудан жалығар емес. Ал, тұрғындар болса, аудан атқамінерлеріне бұл үйде тұру тым қауіпті екенін қанша мәрте айтса да, сенгілері келмей отыр. Мәселенің мән жайын әріптесім Гүлсанат Қалмырзақызы біліп келді.
Салтанат Омарованың бұл он жылға жуық уақыт пәтер кезегінде тұрып, алған баспанасы. Алайда үшінші топтағы мүгедектігі бар ананың қуанышы көпке созылмады. Мемлекеттік бағдарлама арқылы алған үйі жылға жетпей-ақ, қабырғасы шатынап, едені опырылған.
Бұл пәтерлер мүгедектер мен толық емес, көпбалалы аналар және бюджеттік қызметкерлерге берілген. Әрқайсысы 20 пәтерлі екі қабатты екі үйде қазір тұрып жатқандары некен саяқ. Өйткені, түнде үйден дуалдардың тарсылдаған дыбыстары шығады. Құлап қалып үйінді астында қалмайық деп үрейленген жұртты әкімдік қарама қарсы орналасқан қызметтік үйге жайғастырыпты.
«Үйіміз апатты, іргетасы дұрыс қаланбаған, судың үстіне үй салған», деп, жарғақ құлағы жастыққа тимей жүрген жұрттың қорқынышын сейілту үшін мердігерлер ғимараттың жарылған жерлерін жамап әлек. Жауырды жаба тоқымақшы. Ал, мынау енді сол: мемлекеттік бағдарлама арқылы салынған үйдің жөндеу жұмыстарынан кейінгі сыйқы.
Мердігер компания «Сұлтан Б» әр үйдің құрылысына бақандай 187 млн. теңге жұмсапты. Ал баспананы қабылдап алған шенеуніктер қирағалы тұрған үйдің құрылыс сапасынан бір жыл бойы «мін таппадық» дейді. Сондықтан бар кінәні тұрғындарға артып отыр. Кәріз суын дер кезінде құрғатпаған соң, ғимарат астына су жиналған деп сүттен ақ, судан таза кейіп танытып отыр.
Сараптама-зерделеу жұмыстарын жүргізген әкімдік қызметкерлері үйді тұруға жарамды деп тауыпты. Ал, тұрғындар мұнымен мүлдем келіспейді. Амалы таусылған жұрттың айтуынша, экспертизалық жұмысты шенеуніктер жабық түрде, тұрғындардың қатысуынсыз, жасырын өткізген.
Даулы мәселенің басы қасына біздің түсірілім тобы жетті дегенді естіп, Түркістан облысының бақылау жөніндегі басқармасының басшысы Айдос Исмайылов келді. Жағдайды көзбен көрді. Шенеунік үйдің құрылысында шикілік бар екенін растады.
Сонымен, қос қабатты үйге қайтадан сараптама тағайындалды. Оған дейін тұрғындар мемлекеттік қызметкерлерге арналған үйді уақытша паналай тұрмақ. Алайда, мұнда да жағдай мәз емес. Қызметтік үй де құлаудың аз-ақ алдында тұр.
Қайда барса да, Қорқыттың көрі демекші, пәтерлерінің апатты екенін дәлелдей алмай дал болған жұрт, қайда барып, қоныстанса да жайлы баспана таппай пұшайман халге түсті.