Ауыл шаруашылығы субсидияларын алушылар үшін 2025 жылдан бастап жаңа қарсы міндеттемелер енгізіледі. ҚР Ауыл шаруашылығы министрлігі мемлекеттен субсидия алушыларға қарсы міндеттемелер енгізу бойынша жұмыс жүргізді. Енді қолдау қаржысын алу нақты нәтижеге қол жеткізуге тікелей байланысты болады.
Мал шаруашылығын дамытуды субсидиялау жүйесіндегі кемшіліктер 2021 жылы Түркістан облысына бөлінген бюджет қаражатын пайдалану аудиті барысында анықталды. Ауыл шаруашылығы министрлігіне оларды жою туралы тапсырма берілді. Нәтижесінде, биыл 25 маусымда субсидиялау қағидаларына ауыл шаруашылығы өндірушілері үшін жаңа қарсы міндеттемелерді енгізуді көздейтін өзгерістер енгізілді. Міндеттемелерді орындау деңгейі субсидиялаудың мемлекеттік ақпараттық жүйесінде тіркелетін болады. Олар 2 жыл қатарынан орындалмаған жағдайда, субсидия алуға жаңа өтінім бере алмайды. Өзгерістер 2025 жылы 1 қаңтардан бастап қолданысқа енгізіледі. Ол уақытқа дейін, биыл тиісті пилоттық жобаны іске асыру басталады.