Шымкентте жарты миллион теңгеге бөтеннің мүлкін ұрлаған рецидивист ұры ұсталды. Түрлі бағадағы ұялы телефондарды 40 жастағы ер адам мешіт келушілері мен сауда нүктелерінің сатушыларынан ұрлаған.
Тағы бір дүкеннің жұмысшысының ақшасын да қолды еткен. Қаскөйдің қылмыстық әрекеттерінен төрт азаматқа шығын келтірілді. Жәбірленушілердің бірінің айтуынша, оның мешітте қуаттағышта тұрған смартфоны жоғалған. Басқа тұрғынның арызына сәйкес, сауда-ойын-сауық орталығының тұрағында тұрған велосипед те ұрланған. Әл-Фараби ауданы полиция басқармасының жедел уәкілдері күдіктіні жедел бақылау орталығының бейнебақылау камералары көмегімен анықталып, ұсталды. Ер адам бұрын соңды ұқсас қылмыстар жасағаны үшін бірнеше рет сотты болған. Қазіргі таңда ол қамауда. Бөтеннің мүлкін бірнеше рет жасырын жымқырғаны үшін 7 жылға дейін бас бостандығынан айырылуы мүмкін.