Ұлы жеңістің 80 жылдығына орай Түркістан облысының әкімі Нұралхан Көшеров 100 жастағы Ұлы Отан соғысының ардагерін құтықтады. Бадан Төребавтың үйіне арнайы барып, қарт майдангерді құрмет көрсетті. Ел Президенті Қасым-Жомарт Тоқаевтың құттықтау хаты мен «Ұлы Жеңіске 80 жыл» бірыңғай мерекелік медалін тапсырды.
Өз кезегінде соғыс ардагері жас ұрпақтың бейбіт өмірде бақытты ғұмыр кешуін тілеп, Қазақ елінің тәуелсіздігі мәңгі жасай берсін деп ақ батасын берді.
Ардагер 1924 жылы 13 қарашада Түркістан облысында дүниеге келген. 1944 жылы 15 қазанда әскер қатарынан шақырылып, 4 ай әскери дайындықтан өткен соң, Белоруссиядан бастап Берлинге дейінгі қан майданда шайқасқан.
Майдангер ауыр шайқаста көзге түсіп, «Ерлігі үшін» медалімен марапатталған. Сондай-ақ 1-дәрежелі «Ұлы Отан соғысы» орденімен, екінші рет «Ерлігі үшін», «Берлинді алғаны үшін», «Германияны жеңгені үшін» медальдарымен марапатталған.
Бадан Төлебаев 1948 жылы Норвегияның шекарасында болып, елге 1950 жылдың қараша айында оралған. Одан соң Кентау қаласындағы Мырғалымсай кенішінде ұзақ жылдар бойы жұмыс істеп, зейнеткерлікке шықты. Бүгінде қария 2 ұл, 3 қыз, 14 немере, 31 шөбере, 2 шөпшек тәрбиелеп отыр.
Айта кетейік, Түркістан облысынан Ұлы Отан соғысына 140 мыңнан астам азамат аттанған. Қазіргі таңда облыста Ұлы Отан соғысының 8 ардагері бар. Қарт майдангерлерге мемлекет тарапынан тұрақты түрде қолдау көрсетілуде. Сонымен бірге тыл ардагерлеріне, Ұлы Отан соғысының қатысушылары мен мүгедектеріне теңестірілген 3 мыңнан астам ардагерге де құрмет көрсетіліп жатыр.