«Жол + Сен = Қауіпсіздік». Осындай атаумен Шымкент қаласындағы білім беру ұйымында полиция қызметкерлері оқушылардың жолдағы қауіпсіз мінез-құлық мәдениетін қалыптастыруға бағытталған профилактикалық конкурс өткізді. Байқауға шамамен 50 оқушыдан құралған үш команда қатысты.
Қатысушылар үшін ойын және танымдық кезеңдер ұйымдастырылып, олардың жол қозғалысы ережелерін білу деңгейі, зейінділігі және түрлі жол жағдайларында дұрыс әрекет ету дағдылары қаралды. Конкурс төрт кезеңнен тұрды, әр кезеңнің қорытындысы бойынша командаларға ұпайлар берілді. Мұндай формат оқушыларға жол қозғалысы ережелерін қолжетімді әрі қызықты түрде меңгеруге, сондай-ақ командалық жұмыс дағдыларын дамытуға мүмкіндік береді. Байқау аяқталғаннан кейін оқушылар полиция қызметкерлерімен бірге көшеге шығып, профилактикалық акция өткізді. Жаяу жүргіншілер аймақтарына жол қауіпсіздігі ережелерін сақтаудың маңыздылығын еске салатын ескертпе жазулар салынды. Атап айтқанда, жолдан өту кезінде мұқият болу, құлаққапты шешу және сақтық шараларын сақтау қажеттігіне шақыратын үндеулер жазылды.