Смартфон қолдана алмайтын қойшының атынан несие рәсімдеген.  Сайрамдық полицейлер өзгені алдап, атынан онлайн несие рәсімдеген күдікті әйелді қолға түсірді. Жәбірленуші банктен несие бойынша берешек туралы хабарлама келген кезде ғана білген.
 Анықталғандай, ол кісі қойшы болған. Смартфонды қалай қолдану керек екенін түсінбей, ауруханада жолыққан бейтаныс әйелден көмек сұраған. Келіншек кейбір қосымшаларды орнату үшін ер адамның жеке куәлігін сұрап, оның атынан мобильді қосымшасы арқылы несиеге сұраныс жіберген. Мақұлдау алғаннан кейін, ақшаны өзіне аударып 1 миллион теңгеден астам шығын келтірген. Ал ірі көлемдегі ақшаны бас пайдасына жаратқан. Қазіргі таңда күдікті әйел ұсталып, сотқа дейінгі тергеп-тексеру амалдары жүргізіліп жатыр.