Шымкент қаласының әкімі Ғабит Сыздықбеков Қаратау ауданы тұрғындарымен көшпелі кездесу өткізді. Өзекті мәселелерді талқылауға Тұран, Нұртас, Тассай, Мирас және Шапырашты шағын аудандарының тұрғындары қатысты.
Диалог барысында инженерлік инфрақұрылымды жүргізу, көлік ағынын азайту, жол салу, қаңғыбас жануарларды аулау, көшелерге ат қою және қоғамдық тәртіпті сақтау мәселелері көтерілді. Сондай-ақ, жергілікті азаматтар қосымша аурухана мен мектеп салу, лифттерді жаңарту, ұялы байланыс сапасын жақсарту туралы ұсыныстармен жүгінді. Мегаполис басшысы тұрғындарды аудан аумағында жүргізіліп жатқан жұмыстардан хабардар етті. Атап айтқанда, әкімшілік-іскерлік орталықты Тұран шағын ауданымен байланыстыратын Алтынсарин көшесін қосу жобасы іске асырылуда. Сонымен қатар, соңғы екі жылда ауданда 241 шақырымнан астам жол төселіп, 602 көше жарықтандырылды. Жақын арада Ақсүмбе көшесін қосу жоспарлануда, бұл Тассай және Тұран шағын аудандары арасында тікелей көлік қатынасын қамтамасыз етеді. Сонымен қатар, өткен жылы демеушілік есебінен Тұран-1 шағынауданының 29 көпқабатты үйіне ұзындығы 4 шақырымға жуық жылу трассасы тартылды. Табиғи газға Ынтымақ-2, Бозарық, Тассай тұрғын алаптары қосылып, Өтеміс шағын ауданында Мәдениет үйі ашылды. Қала әкімі халықтың өмір сүру сапасын арттыруға бағытталған инфрақұрылымдық жобаларды іске асыру жоспарлы түрде жалғасатынын атап өтті. Аудан әкімдігіне халықпен кері байланысты күшейту және тұрғындарды қабылданып жатқан шаралар туралы уақтылы хабардар ету тапсырылды.