Шымкенттік полицейлер құқық бұзушылықтарды дрон көмегімен анықтайды. «Учаске» және «Мал ұрысы» жедел-профилактикалық іс-шаралары барысында Қаратау ауданының аумағында учаскелік инспекторлар заңсыз мал жаю жайттарын байқады.
Құқық бұзушылықтар аумақты әуе арқылы бақылау кезінде, яғни пилотсыз ұшу аппараттарының көмегімен зерделенді. Полицейлердің айтуынша, дрондарды қолдану бақылау аумағын едәуір кеңейтіп, патрульдеудің тиімділігін арттырған. Жаяу немесе автопатрульдеу кезінде көзге көрінбеуі мүмкін құқық бұзушылықтар жоғарыдан бақылағанда оңай байқалады, – дейді олар. Рейд барысында малдың белгіленбеген жерде, қараусыз және ауыл шаруашылығы жануарларын ұстау ережелеріне қайшы жайылғаны анықталды. Мұндай жағдайлар жануарлардың қозғалысы көп жолдарға шығып кетуіне байланысты жол қауіпсіздігіне қатер төндіреді. Мал иелері жауапкершілікке тартылды. Оларға түсіндіру жұмыстары жүргізіліп, бекітілген талаптарды қатаң сақтау қажеттігі ескертілді.