Полиция есірткі қылмыстарын тоқтату және азаматтарды, әсіресе жастарды заңсыз айналымға тартудың алдын алу жұмысын жалғастырып келеді. Жыл басынан бері елде есірткіге қатысты 3 мыңнан астам қылмыс тіркелді.

Көбінесе есірткіні сату, сақтау және интернетте жарнамалау қылмыстары кездеседі. Полиция бірнеше жасырын зертхананы тауып, аса көп мөлшерде есірткі мен прекурсорларды тәркіледі. Жамбыл облысы, «Алматы – Екатеринбург» бекетінде қызметтік ит Теяның көмегімен 18 келі гашиш тәркіленді. Ұсталған адам есірткіні Шу ауданында жинап, Астанаға апара жатқанын айтты. Шымкентте 26 жастағы жүргізушіден Алматыдан әкелген шамамен 1 келі мефедрон табылды. Солтүстік Қазақстан облысында 30 жастағы ер адамның көлігінен 600 грамнан астам A-PVP және мефедрон табылды. Күдіктілер ұсталып, тергеуге алынды.

БАҚЫТЖАН ӘМІРХАНОВ, ІІМ ЕСІРТКІ ҚЫЛМЫСЫНА ҚАРСЫ ІС-ҚИМЫЛ КОМИТЕТІНІҢ БАСҚАРМА БАСТЫҒЫ
 - Ішкі істер министрлігі есірткіні тасымалдау, сақтау немесе заңсыз айналымға көмектесу - қылмыс екенін ескертеді. Министрлік азаматтарды сақ болуға және күмәнді ұсыныстарға келіспеуге шақырады. Қоғамның қауіпсіздігі әр азаматтың жауапкершілігіне байланысты.»