Астана қаласында 1-5 ақпан аралығында грек-рим, еркін және әйелдер күресінен ел чемпионаты өтті. Айтулы күрес бәсекесіне еліміздің 20 өңірінен 600-ден астам балуан қатысып, боз кілемде өзара мықтыларын анықтады. Тақырыпты тілші толықтырады.
Бұл ел біріншілігінің әлеуеті жоғары. Шын мықтылар Ұлттық құрамаға шақыртылып, Париж олимпиадасының жолдамасы үшін өтетін лицензиялық жарыстарға қатысатыды. Қазақстан Республикасының күрес түрлері федерациясының президенті Дәулет Тұрлыханов биылғы ел чемпионатында балуандардың қандай дәрежеде өнер көрсеткенін айтып, олимпиада жылы болғандықтан барлық салмақ дәрежелерінде елдің намысы үшін күресетін саңлақтарды жан-жақты зерттеп, олимпиадаға тынғылықты дайындау керегін жеткізді.
 Жалпы 5 күнге созылған күрес бәсекесі өте жоғары деңгейде өтті. Барлық балуандар елшілік додада топ жару үшін боз кілемде аянып қалмады. Осы орайда Түркістан облысының балуандарының да қанжығалары майланды. Грек-рим күресінде жалғыз қоланы 55 келідегі жерлесіміз Қасым Аден олжалап, облыс қоржынына салды. Ал, әйелдер күресінде түркістандық бұрымдылар жарады. Олар 1 күміс, 4 қоланы олжалап, 20 өңірдің ішінен командалық ІІІ-орынды иеленді. Облыс мерейін үстем еткен арулар қатарында 53 келіде бақ сынаған Аяжан Марқашева күміс медальді мойынында жарқыратса, төрт бірдей түркістандық ару қола медаль олжалады. Атап өтсек, 57 келідегі талантты балуан қыз Шұғыла Өмірбек, 59 келіде Мадина Аман, 65 келіде Гүлдана Өсербай, 72 келіде Шәмшиябану Тастанбек сынды дарынды бұрымдылар бар.
 Сондай-ақ, Еркін күрестен облыстың аға жаттықтырушысы Ерлан Сатымбетов бастап келген шәкірттер де жүлде үшін тартысты жекпе-жектер өткізді. Қорытындыда облысымыздың мақтанышы 57 келіде белдескен Асылжан Есенгелді қола алқаны місе тұтты. Осы тұрғыда еліміздің күрес түрлері федерациясының Президенті Дәулет Тұрлыханов Түркістан облысының балуандарының жеткен жетістігін айтып, өз пікірімен бөлісті.
Айта кетейік, Ел чемпионатында топ жарған балуандар сәуір айында Қырғызстан елінде өтетін лицензиялық Азия чемпионатында еліміздің намысы үшін бақ сынайды. Отандастарымызға сәттілік тілейміз!