Елімізде 17 мамырдан бастап шетелдік автокөліктерге арналған бензин мен дизель отыны бекітілген бағамен саудаланады. Бұл туралы энергетика министрлігі хабарлады. Мұндағы мақсат - Ішкі нарықтағы жанармай теңгерімін сақтау, сонымен қатар мұнай өнімдерінің ағыны мен «сұр» экспортының тәуекелдерін барынша азайту.
ҚР энергетика министрінің шетелдік көліктерге арналған АИ-92, АИ-93 бензині және дизель отындарының жаңартылған бағалары бойынша бұйрығы жарияланды. Енді шетелдік көліктер үшін АИ-92 және АИ-93 бензині — литріне 245 теңгеден саудаланады. Қазақстанда берілген жүргізуші куәлігін көрсеткен кезде тәулігіне 100 литрге дейінгі мөлшерде — литріне 205 теңгеден беріледі. Қазақстанда берілген мотоциклдерге, жеңіл автомобильдерге, жүк көліктеріне, арнайы, мамандандырылған жеңіл автомобильдерге және автобустарға жүргізуші куәлігін және көлік құралын тіркеу куәлігін көрсеткен кезде — тәулігіне 300 литрге дейінгі көлемде — литріне 205 теңгеден сатылады. Шетелдіктер үшін дизельдік отын — литріне 315 теңге болып бекітілді. Елімізде тіркелген жүргізуші куәлігін көрсеткен кезде тәулігіне 100 литрге дейінгі мөлшерде — литріне 295 теңгеден ала алады. Қазақстанда берілетін жүргізуші куәлігін және көлік құралын тіркеу куәлігін көрсеткен кезде жүк көліктеріне, арнайы, мамандандырылған жеңіл автомобильдерге және автобустарға тәулігіне 300 литрге дейінгі көлемде — литріне 295 теңгеден сатылады, — делінген құжатта. Осылайша, Қазақстан Республикасының куәлігі мен көлік құралын тіркеу туралы куәлігі бар азаматтар үшін жанар-жағармай бағасы өзгеріссіз қалады.