Шымкенттік шәкірттер IX Республикалық WorldSkills Kazakhstan-2024 кәсіби шеберлік чемпионатынан жүлдемен оралды. Астанада өткен жұмысшы мамандықтарының ұлттық чемпионатынан жерлестер бірінші және екінші орынды қанжығаға байлады. Жеңімпаздарды ұстаздары мен тілеулестері темір жол бекетінен зор қошеметпен күтіп алды.
Шымкенттегі жол-көлік колледжінің студенті Руслан Губайдуллин WorldSkills Kazakhstan-2024 чемпионатынан 2-орынды жеңіп алды.  Ол бұл байқауда жеңіл автомобильдерді жөндеу» құзыреттілігі бойынша қарсыластарымен бақ сынасып, ұстаздарының үмітін ақтады.
РУСЛАН ГУБАЙДУЛЛИН, ІІ-ОРЫН ИЕГЕРІ
 Байқауда топ жарып, мыңдаған студенттің арасынан суырылып алға шығау оңайға соққан жоқ. Чемпионат шарттарын мұқият орындап шықтым. Жеңіске жетуіме себепкер болып, маған бар м.мкіндікті жасаған ұстаздарыма алғыс айтамын. Болашақта автокөлік саласының білгір маманы болғым келеді.
Жол-көлік колледжі жыл сайын өтетін дәстүрлі жарыста керемет нәтижелерге қол жеткізіп жүр.
Бәсі басым байқауда өңірлік кезеңдерден өткен 550-ден астам колледж студенттері қатысты. Үш күн бойы олар 30 құзыреттілік бойынша сынға түсті. Жұмыс алаңдарында қатысушылардың кәсіби дағдыларын 558 сарапшы бағалады.
 Ал, Надирбек Рустамханов Шымкент аграрлы-техникалық колледжінің шәкірті. Сантехника және жылыту мамандығының қыр-сырын жетік меңгерген ол үшін бұл байқауда бақ сынау қиындық тудырмапты. Білімі мен ұстаздарының үйреткен ілімінің арқасында Надирбек жүлделі бірінші орынды қанжығаға байлады.
Надирбек енді ел намысын  келер жылы Данияда өтетін EuroSkills чемпионатында қорғамақ. Командалық есепте Астана қаласының құрама командасы көш бастады. Шымкент командасы Алтын саны бойынша 5-орында. Баллдық есеппен 9-орынды иеленді.