ТҰРҒЫНДАР ТІРКЕЛМЕГЕН ҚАРУДЫ ӨЗ ЕРКІМЕН ТАПСЫРДЫ
Қылмыс пен құқық бұзушылықтың алдын алу аясында Түркістан облысында тұрғындардан тіркелмеген қаруды сатып алу бойынша акция өткізіліп жатыр. Іс-шара барысында облыстың 149 тұрғыны полиция органдарына тіркелмеген 181 қаруды өз еркімен тапсырды. Оның ішінде 160-тан астамы тегіс ұңғылыға жатады.
Қару-жарақ заттарын ерікті түрде тапсыру үшін оның техникалық жағдайына байланысты қарудың әрбір бірлігі үшін төлем қарастырылған. Осылайша атыс қаруын өз еркімен тапсырған 80-нен астам азаматқа 8 млн теңгеден астам қаражат төленді. Сонымен қатар тіркелмеген атыс қаруын, оқ-дәрілерді және жарылғыш заттарды өз еркімен тапсырған азаматтар қылмыстық және әкімшілік жауапкершіліктен босатылады. Тәртіп сақшылары Түркістан облысының тұрғындарын акцияға түсіністікпен қарауға және белсенді қатысуға шақырады.