ЖАЗУШЫ МҰХТАР МАҒАУИН ӨМІРДЕН ӨТТІ

 Қаралы хабар. Халық жазушысы Мұхтар Мағауин 85 жасқа қараған шағында өмірден өтті. Бұл жайында жазушының ұлы Едіге Мағауин хабарлады. Ұлының сөзінше, абыз АҚШ-тың Мерилэнд штатындағы үйінде, бала-шағасының ортасында, 2025 жылғы қаңтардың 9-ы, жергілікті уақыт бойынша сағат 19:55-те (Қазақстан уақыты бойынша қаңтардың 10-ы, сағат таңғы 5:55) бақиға аттанды.

Мұхтар Мағауин 1940 жылы 2 ақпанда Шығыс Қазақстан облысы Аягөз ауданы Баршатас ауылында дүниеге келген. Ол - тарихшы, жазушы, қазақ әдебиетін зерттеуші ғалым. Филология ғылымдарының докторы, Қазақ КСР Мемлекеттік сыйлығының лауреаты, Қазақстанның халық жазушысы. "Қобыз сарыны", "Көк мұнар", "Аласапыран", "Мен", "Жармақ", "Шыңғыс хан" сияқты танымал шығармалары бар.

«Көлме-көл» Толық шығармалар жинағында Мұхтар Мағауин: «Көзім жұмылған мезетте, бұрнағы Алапат Бабаларым сияқты, өлмес, өшпес, Мәңгілік Әруаққа айналам! Иә!» деп жазған еді. Марқұмның туыстарына және барша оқырман қауымға қайғырып көңіл айтамыз.